Mitologia em Mirandés

Habendo Jasus nacido an Belen de la Judeia, ne l tiempo de l rei Harodes, uns magos de l Ouriente chegórun a Jerusalen i preguntórun: "adonde stá l Rei de ls judius, que naciu por estes dies? Nós bimos la sue streilha n'Ouriente i benimos pa L'adorar."Quando soubo desso, l rei Harodes quedou mui albrotado i, cumo el, toda la cidade de Jerusalen. Anton, ajuntou todos ls príncepes de ls saçardotes i ls scribas de l pobo i preguntou-les adonde iba a nacer l Messias. Eilhes respundírun: «An Belen de la Judeia, pus assi fui screbido pul porfeta: "I tu, Belen, tierra de Judá, assi i todo nun sós la más pequeinha antre las prencipales cidades de Judá, pus de ti salirá un Xefe que guiará l miu pobo, Eisrael"».

Anton, Harodes mandou chamar ls magos, an segredo, pa le sacar anformaçones subre la data cierta an que la streilha l'aparecira. Apuis, ambiou-los a Belen, dezindo-le: «Ide i anformai-bos bien subre l Nino. Quando L'achardes abisai-me debrebe pa que tamien you baia alhá a adorá-Lo». Assi que oubírun l rei, metírun-se al camino. I la streilha, que tenien bisto ne l Ouriente, iba delantre deilhes, até que parou mesmo po riba de l sítio adonde staba l Nino.

Quando bírun outra beç la streilha, ls magos quedórun mui cuntentos. I al antrar na casa bírun l Nino cula mai dEl, Marie. Azinolhórun-se delantre dEl i adorórun-Lo. Apuis, abrírun ls sous tesouros i ouferecírun-Le ouro, ansénsio i mirra.Tenendo sido abisados an suonhos pa que nun tornáran por casa de Harodes, eilhes bolbírun pa la sue tierra por outro camino.

Amadeu Ferreira In Mensageiro de Bragança, 02/02/2002