La Fuonte de Bandúzia

(Waterhouse)


Ah fuonte de Bandúzia mais clara do que l bidro,
merecedora de puro bino doce i tamien de flores,
d’oufierta tenerás manhana un chibo,
a quien la tiesta abultada puls cuornos
pequeinhos al amor i a la lhuita çtina.
An balde: pus te há-de tenhir las frescas
augas cun burmeilho sangre
l filhico dun campante tagalho.
A ti la mala hora de la scaldante Canícula
nun puode chegar, tu l frescor amable
als touros cansados pul arado
oufereces i al ganado que por ende pace.
Tamien tu hás-de quedar antre las afamadas fuontes
por you haber coincido l carrasco spetado an riba las uocas
peinhas, d’adonde cantadeiras
tues augas cáien.


Hourácio Flaco, Odas, Lhibro III, XIII